YMISKT

Klikka á myndina og síggj hana í fullari stødd. Myndatekstur sæst við at peika á myndina við músini

Bendilormur Mosgovoiya pectinata

Fyrstu ferð eg sá ein haru-bendilorm, var tá eg fekk ein frá Jákup Absalonsen á Viðareiði. Hann varð funnin í eini haru, sum Jákup hevði skotið 02.12.2006. Seinni vórðu bendilormar eisini funnir í harum í Nólsoy og aðra staðni við.

Í sambandi við torradagarnar 18.-23. februar 2019 var mynta- og seðlaframsýning í Spinnarínum

Grein í Norðlýsinum um framsýningina

____________________________________

Spinnaríið í Klaksvík 23.02.2019

Nokk so stuttligt at koma við eini gamlari mynt, og so fáa at vita,at virði á henni er minst 100.000 kr.

Grein hjá Tim Ecott í The Telegraph um ferðavinnu í Føroyum

"Could this unspoilt archipelago become an unlikely overtourism battleground?"

Les greinina

Fløskupostur úr Newfoundlandi og Labrador

06.11.2018 kl. 09.45 fann Hans Eli Sivertsen hendan fløskupostin, sum Curt Chambers úr Brig Bay, Newfoundland og Labrador sendi av einum fiskiskipi um miðjan juli 2018. Tað hevur sostatt tikið fløskupostinum umleið 4 mánaðir at ferðast 3100 kilometrar frá Newfoundland og Labrador til Leynar.
Plasticfløskur sum hesar flóta á sjónum, so vindurin hevur eisini ført hesa fram.

Spreingitráður liggur beint undir vatnskorpuni, so hann ferðast ikki eina við vindi; men óivað fer ein rúgva av spreingitráðnum, sum er tveittur á sjógv í Føroyum seinastu 2 árini, at síggjast aftur í øðrum londum.

Les um Brig Bay

Høgguslokkur Sepia

3 grøðiskelir av høgguslokkaslektini Sepia eru funnar í Føroyum, og Hans Eli Sivertsen hevur funnið allar.

02. mai 2018 fann hann ta fyrstu í Leynum, dagin eftir fann hann eina í Kaldbaksbotni, og tríggjar dagar seinni fann hann ta triðju í i Leynum. Hesar grøðiskelirnar stava helst frá epiahøgguslokkinum Sepia officinalis,som er ein høgguslokkur við 10 armum. Hann er vanligur í Miðalhavinum, landnyrðingspartinum av Norðsjónum og upp til Noregs.
Eins og aðrir høgguslokkar hevur hesin eisini blátt blóð, og fyrr varð tað brúkt sum blekk. Grøðiskelirnar verða millum annað brúktar sum kálkískoyti til búrfuglar.
Vit kenna ikki til nakra aðra grøðiskel, sum er funnin her - hóast tær flóta, so vit vilja fegin hoyra frá fólki, um tey vita um nakra.

Dagføring 12.05.2018: Nú 6 dagar seinni, hevur Hans Eli Sivertsen funnið ikki minni enn 5 grøðiskelir aftrat.
Harumframt fann Hanna Joensen 6 skelir av sama slag, tá hon gekk ein túr á Sandi dag.

Dagføring 13.05.2018: Hans Eli Sivertsen hevur funnið fleiri skelir aftrat.

Rodmund á Kelduni fann 3 skelir í Sandavági og 1 í Sørvági.

Poul Johannes Simonsen fann 5 skelir í ávikavist Hvannasundi, Árnafirði og Norðagøtu.

Dagføring 02.06.2018: Maria Kristiansdóttir og Trygvi funnu 1 í Vestmanna.

Les um grøðiskel í bókini Gomul Føroysk Heimaráð

Les greinina hjá R. Spärck frá 1923 um Sepia officinalis í Føroyum

Trøllahummari Galathea sp.

Kaldbaksfjørður 18.02.2018

Rotta Rattus norvegicus Bergenhout, 1769

Arngrím Petersen skeyt hesa sprøklutu rottuna í Kollafirði 24.10.2017.

Hjartaskapað igulker (DK. sømus) Echinocardium

Hetta slagið av igulkeri hevur bæði munn og gat á undursíðuni

Igulker Echinoidea

Vanligt igulker hevur munn við tonnum á undursíðuni og gat á tí ovaru síðuni

VIT ERU BETRI ROTTUALARIR ENN TÝNARIR ...

Nú ein dagin fingu vit 3 rottur frá Arngrím Petersen í Kollafirði, sum hevði skotið tær. Tann eina rottan var kviðin og hevði 9 ungar í búkinum. Um vit halda okkum til roknistykkið hjá Eyðfinn, so høvdu hesar 9 kunna blivið til 7758 eftir einum ári.

Samstundis sum fellur verða settar upp og gift løgd, sær man deyðan fenað kring landið. Um eg hevði verið ein rotta, hevði eg ikki funnið uppá at farið í eina fellu ella etið gift - hví skuldi eg tað, um eg fekk alt mær lysti av fjalli og í fjøru?

Áheitan frá Eyðfinni Magnussen

Búrfiskur Hoplostethus atlanticus

Longd 58 cm, vekt 4 kg

Búrfiskur finst á øllum Miðatlantiska rygginum norður til Grønlands og Føroyar-Íslandsryggin, við Labrador, Nova Scotia til Suðurafriku, við Australiu og New Zealand.
Búrfiskur verður upp til 75 cm.
Kelda: Havstovan
Búrfiskur ynglar ikki, fyrr hann er 20 ára gamal, og tá er hann umleið 30 cm. til longdar. Tað sigur seg sjálvt, at tá tað gongur so long tíð, áðrenn næsta ættarlið tekur við, so er lætt at týna hann.
Sum dømi kann nevnast, at australar ikki funnu búrfiskin fyrr enn seint í 1970’unum, men longu í 2008 var bert 10% eftir av stovninum har um leiðir, so búrfiskurin var fyrsti fiskurin, ið endaði á australska reyðlistanum vegna ovurfisking.
Tann elsti búrfiskurin, mann veit um, gjørdist 149 ára gamal, og tað sá mann á nitrunum.

Les meira

NÁTTÚRAN ER FANTASTISK!

Nú veðurfyribrigdið El Niño enn einaferð er við at taka seg upp, kann heimurin vænta eitt sera keðiligt summar við glopraregni, kulda og vatnflóðum, líka sum vit sóu í til dømis Onglandi fyri fáum árum síðani.
Eg fekk áhuga fyri El Niño fyri gott 17 árum síðani. Ikki vegna veðrið, men tí tá verpur heimsins størsti papageykur kakapoin, sum ikki kann flúgva :)
Á New Zealandi vaksa nøkur furulíknandi trø, ið eita "podocarper", sum kakapoin etur. Hetta træ er sermerkt á tann hátt, at tað ber sera nógva frukt tey árini "El Niño" herjar. Mann meinar, at fruktin frá podocarpertrænum hevur nøkur hormon í sær, sum setur verpingina í gongd hjá kakapoanum.
Tað vóru bara 54 kakapoir eftir í 1998 - nú eru teir 126, so tað gongur striltið - men tó framá hjá teimum, ið royna at bjarga hesum so sjáldsama og áhugaverda risastóra fugli.
Í viðhefta pdf fílinum kunnu tit lesa mína gomlu (dagførdu) grein, sum eg - Marita - skrivaði til Dimmalætting í 1998 :)

BERT 100 KILO ERU EFTIR AV HEIMSINS TYNGSTA PAPAGEYKI

RUSSISKUR HUNDUR SKOTIN Í KALSOY

27.01.2015 skjeyt Jákup Samson hendan hundin umleið 1 km sunnan fyri Syðradal á Kalsoynni.
Fólk høvdu sæð hundin í tveir dagar, og Jákup hevði fleiri ferðir roynt at nærkast honum; men hundurin rann undan. Seinastu ferð, hann royndi, rann hundurin seg fastan niðri á helluni, og tá varð hann skotin. Jákup hevði samband við løgregluna alla tíðina.
Ein loðsur helt seg kenna hundin aftur frá einum russiskum skipi.
Hvussu hundurin er endaður á sjónum, er ikki gott at vita; men hann var bæði rak og bebbaræddur.

YUCCA PÁLMI VAR EIN ZOOLOGISKUR HAVI

Jórun Biskopstø Simonsen keypti nýliga ein yucca pálma, sum vísti seg at verða ein heilur zoologiskur havi. Jórun fangaði fleiri klárar ormar, tvey sløg av maðkum, nøkur skolopender Chilopodade við meira, áðrenn hon gav skarvin yvir og sendi pálman á brennistøðina.

Tíverri er hetta ikki nøkur óvanlig hending – mann heldur seg keypa eina plantu, og hugsar ikki um, hvat meira, mann fær við í keypinum. Og soleiðis beina vit eisini fyri føroysku náttúruni...

TASKUKRABBI Cancer pagurus

Mona B. Joensen og Marni Johannesen, Sandur, fangaðu hendan stóra taskukrabban Cancer pagurus á eini kalvalínu vestan úr Skúvoy seint á heysti 2013.

Dagføring december 2015: Taskukrabbi er vorðin alt meira vanligur í Føroyum.

Kvennkrabbi / Female

Kallkrabbi / Male

ARGIR 17.06.2012

17.06.2012 vórðu føroysk ross sett á beiti uttanfyri Umhvørvisstovuna fyri at gera vart við væntandi áhugan fyri føroyskum djórum hjá føroysku mynduleikunum.

Beinta & Gráfaksi

SVANGUR SEYÐUR

Vegna vánaligt veður er eingin gróður, so seyðurin roynir at lívbjarga sær við at eta mosa. Tá vit minnast vánaligu lívskorini í gomlum døgum verður stundum havt til orða, at føroyingurin doyði við tarablað í munni - eg vóni ikki, at vit fara at minnast árið 2012 sum tað árið, tá seyðurin doyði við mosa í munni. Myndirnar eru tiknar 08.06.2012.

Á SEIÐABERGI Í LEIRVÍK

Eingin seiður er at fáa í Nólsoy í løtuni, so 08.06.2012 fóru vit til Leirvíkar við tráðuni, har vit syftu 132 seiðir upp á land í eini handavending. Seiðurin var nakað rak, men hann smakkaði ógvuliga væl, stoktur á pannuni saman við livrini og ongum øðrum.

Seiðurin varð kruvdur á staðnum og tað líkti másunum

Enskt í útlondum

ÓKENDUR HØGGUSLOKKUR

Haliphron atlanticus

15. mai 2009 fekk Poul Johannes Simonsen fatur á hesum ókenda høgguslokkinum, tá Grønanes fiskaði á leiðini 61.30N 5.00W.

Enn hevur eingin kunna staðfest, av hvørjum slag, høgguslokkurin er. Hann er brúnur, kroppurin mátar umleið 50 cm. í tvørmát og hann hevur heilt stuttar trevsur.

Í 2018 funnu vit fram til slagið - les meira um høgguslokkin

Á STÓRHVALAVEIÐU Í SUÐURÍSHAVINUM UMBORÐ Á WILLEM BARENDSZ

Nólsoyingurin Mikkjal Gulklett, skrivaði dagbók, og her ber til at lesa sera áhugaverdu greinarøðina úr FF blaðnum "Á stórhvalaveiðu í Suðuríshavinum", sum er ein endurgeving av tí, Mikkjal skrivaði, tá hann var um borð á Willem Barendsz í 1946.

Les greinina

LIMAX MACIMUS

Ókendur snigil funnin í 2003

Limax macimus er fjølbroyttur á liti, eins og flest aðrir sniglar; men hesin er tann mest vanligi á Svangaskari

Les pdf greinina

Nýggjur snigil funnin í Føroyum

Arianta arbustorum.
Lesið sniglagreinina

Nýggj sera vøkur frímerki eru útgivin - les meira

Gangari av hundasleðu funnin í Sørvági
Hendan gangaran av eini hundasleðu fann tann kendi teknarin og rithøvundurin Lasse S. tann 20. juni, tá hann gekk ein túr framm við strondini í Sørvági. Gangarin sær heilt nýggjur út, so hann hevur ikki ligið leingi í sjónum.
Sambært Emil Rosing frá Greenland National Museum er gangarin av eini hundasleðu úr Thule; hóast hann eins væl kann verða rikin út frá einum øðrum øki so sum Norðvesturgrønlandi, Eysturgrønlandi-Ammassalik ella Scoresbysund, har tað at koyra á hundasleðu eisini er heilt vanligt.

Føroysk lava
Føroyar eru av vulkanskum uppruna, og ymsa staðni kring landið liggja sera áhugaverdar slóðir av lava frá fornari tíð. Steinurin á myndini var funnin norðri í Svínoy. Hann mátar 16 x 13 cm í tvørmát.

VITJA HEIMASÍÐUNA - SE HJEMMESIDEN - VISIT OUR WEBSITE
Copyright© Jens-Kjeld Jensen All Rights Reserved