Súlukongur Thalassarche melanophris (Temminck, 1828)

Ein súlukongur kom til Mykinesar í 1860. Hann vendi aftur til súlurøkurnar á Mykinesi á hvørjum ári, til hann varð skotin í 1894, og tá hevur hann verið nakað væl eldri enn 34 ár.

Petur Petersen (á Botni) tók fjaðurbúnan av súlukonginum og sendi hann til Danmark (Knud Andersen), og síðan tá hevur man bara hildið, at fjaðurbúnin var burtur, tí hann var ikki skrásettur nakra staðni í skjalasavninum hjá Zoologisk Museum. Men í 1996 gav Jon Fjeldså J-K.J lov at leita í nøkrum stórum kassum við óskrásettum stórum fjaðurbúnum í risastóra savninum hjá Zoologisk Museum, og tá fann J-K.J tann sera væl varðveitta súlukongin frá Mykinesi og tók hesa myndina av honum.

Teir seinastu 151 dagarnir í einum enskum lundalívi

Eli Lassen hevur tikið myndirnar av lundanum.

Dagføring 09.02.2023: Lundarnir, sum eru funnir deyðir fram við vestursíðuni av Frankaríki og niður til Kanarisku oyggjarnar, eru deyðir í hungri

E.S. Lundin helt til vestan fyri Frankaríki og norðan fyri Portugal í 2 mánaðir frá august til 20. oktober 2022, tá hann so kúvendi í ein norðan. Hann var skotin 05.11.2022

Grein úr The Herald

Lomvigi Uria aalge albionis

Hetta er fyrsta fráboðanin av einum lomviga av undirslagnum Uria aalge albionis, sum varð ringmerktur sum pisa í Helgolandi.  

Hetta sunnara undirslagið (albionis) hevur ljósari gráan bak enn teir føroysku lomvigarnir. Undirslagið er bert skrásett 3 ferðir fyrr í Føroyum, sambært “Færøernes fugle - fakta og tal”, men helst er orsøkin, at fólk ikki geva sær far um hann. Sama ger seg galdandi við Uria aalge hyperborea, sum er væl størri enn føroysku lomvigarnir. Sjálvur havi eg sæð bæði undirsløgini væl oftari, enn tær 3 ferðirnar, eg eri skrásettur fyri.
02. december 2021 var Hans Eli Sivertsen úti og skeyt. Hann skeyt millum annað 4 lomvigar, har tveir vóru av undirslagnum Uria aalge albionis. Tann eini var ringmerktur sum pisa 24. juni 2021 á oynni Helgoland í Týsklandi.
Hetta er fyrsta skráseting av eini ringmerktari lomvigarpisu úr Helgolandi, som liggur í eini fjarstøðu av 1200 km frá eystursíðuni av Nólsoy, har hon varð skotin. Sambært “Færøsk Trækfugleatlas (The Faroese Bird Migration Atlas)” er ein føroyskt ringmerktur lomvigi funnin í Týskland, men man veit ikki, um tann lomvigin varð klaktur í Føroyum ella í Helgolandi.
E. S. Ein lomvigarpisa vigar vanliga minni enn ein vaksin fuglur, men hendan pisan, sum Hans Eli skeyt, og sum bara var gott 5 mánaðir gomul, var feit. Hon vigaði 950 g, ella nærum tað sama sum ein vaksin lomvigi

Silkihegri Egretta garzetta

Í oktober 2021 vórðu fleiri silkihegrar sæddir kring landið. Ein var sæddur av fleiri í Tórshavn, og 17. oktober fann Sigga Vang hann deyðan í Steinatúni. Hon gav okkum hann, og Jens-Kjeld hevur nú kannað hann nærri. Talan var um ein gamlan steggja, sum bara vigaði 300 g. Vanliga vigar hann 450 g. Magin varð kannaður, og í honum vóru hvørki nytrur (frá fiski) ella nakað plastikk; men bara ein svørt evja, sum sæst á myndunum.

Hanna Joensen avmyndaði hendan kúhegran í Sandoynni 27.04.2018. Hetta er onnur skráseting av kúhegra í Føroyum.
Tann fyrsti kúhegrin varð sæddur og avmyndaður av Tummas Tomassen á Viðareiði 28. september 2008. Seinni sóu fleiri hann.

Tann fyrsti diglutrøsturin í Føroyum varð skrásettur 13. november í 1959.

Harmadúgva Zenaida macroura

14. november 2017 sá Esbern í Eyðansstovu eina harmadúgvu í Mykinesi. Harmadúgvan fleyg runt í Mykinesi til 21. november, tá hon tyktist vera illa fyri. Esbern tók sær so av dúgvuni, men hon doyði tveir dagar seinni.
Hetta er fyrstu ferð, at hetta slagið av dúgvu er skrásett í Føroyum, og hon er bert skrásett 6 ferðir áður í Europa.
Føroyska navnið á dúgvuni er sprottið úr harmuliga látinum hjá henni. Danir kalla hana sørgedue og bretar kalla hana Mourning dove.

Hoyr látið hjá harmadúgvuni

Turtildúgva Streptopelia turtur

Les meira

Tann 04. juni 2016 fann Bogi Jacobsen ein deyðan kjarnbít í sínum hava, sum var ringmerktur í Polen. Hetta er fyrsti ringmerkti kjarnbítur, sum er funnin í Føroyum, og hetta er eisini fyrstu ferð, at ein polskt ringmerktur fuglur er funnin í Føroyum.

Les um fuglin

Ringmerkingarfrágreiðingin

Dimmmorreyð ont Anas rupribes

24. juni 2015 fekk Selma Mc Intosh eina sera sjáldsama vitjan á síni trappu í Tórshavn. Talan var um eina amursmyrlabøgu, sum Selma tók hesar báðar myndirnar av. Amursmyril verpur frá Suðursibiria til eystara partin av Kina og Korea, og hevur vetrarvist í fleiri londum í Suðurafrika. Amursmyril er sera sjáldsamur í øllum Europa.

Fagurfinka Carduelis carduelis

Svartur svanur Cygnus atratus

Svartur svanur stavar úr Australia og teir, vit síggja her, er antin slopnir úr fangilsi ella eru ungar hjá hesum. Í Stórabretlandi verpa umleið 25 pør vilt úti í náttúruni og í Danmark stúra fleiri fyri, at svartin innsløddi svanin kann útrudda tann hvíta knúpsvanan. Tað er serliga hesi seinastu 10 árini, at svarti svanin rættiliga hevur fingið fótafesti í Norðureuropa. Í Danmark verður svarti svanin roknaður sum ein innslødd hóttan, sum er líka vandamikil sum garðaskøra Alchemilla mollis og morsnegil Arion lusitanicus.

Skrásetingar av svørtum svanum í Føroyum:

Seinast í 1930'unum var ein svartur svani í eitt longri tíðarskeið við Leitisvatn.

Í apríl 2002 var ein sæddur við Vestmanna, og helst er talan um sama fugl, sum seinni var sæddur á Sandsvatni.

Í 2006 hevði Petur Nolsø í Tórshavn – so løgið tað ljóðar – eitt par av svørtum svanum, sum fingu 4 ungar.

Í mai 2012 var ein svartur svani sæddur nær Tórshavn og seinni fleyg hann runt í Sandoynni.

Hesin frá 2014 var fyrst var sæddur í Vágseiði, Suðuroy 12. februar, og helst er talan um tann sama, sum nú heldur til við Skálafjorden. Hann kann verða komin antin úr Stórabretlandi ella frá Petur Nolsø.

Faksaterna Sterna sandvicensis

Fyrst í apríl sá Hanna Joensen 3 faksaternur nærhendis Sand, tær hildu til har í fleiri dagar. Síðani varð ein avmyndað 85 fjórðingar suður úr Akrabergi. Poul Johannes Simonsen sá eina í Hvannasundi, umframt at fleiri aðrar vórðu sæddar í Norðoyggjum og við Skálafirðin. Tann seinasta fráboðanin kom frá Hans Eli Sivertsen, sum sá eina í Sandágerði 20.04.2013. So í minsta lagið 5 ella 6 faksaternur vitjaðu Føroyar í apríl 2013.

Reyðstapi Bombycilla garrulus

Innrás av reyðstapa: Fyrsta fráboðanin eg fekk um reyðstapa, var úr Sandavági 22.10.12. Næstu 3 vikurnar sóust teir um alt landið; men nú síggjast bert einkultir.

Les greinina

Lítil valmási Larus glaucoides doyr í hungri

Lítil valmási Larus glaucoides verpur í Grønlandi og nakað longur í ein vestan verpur kumliensmási Larus glaucoides kumlieni, sum er eitt undirslag av lítlum valmása.
Vit høvdu eina rættiliga innrás av lítlum valmása mánaðarskiftið januar/februar 1983 og ikki fyrr enn nú, fyrst í januar 2012, kom ein nýggj innrás. Lítlu valmásarnir eru alla staðni, og eg havi tosað við fleiri fiskarar sum siga, at einir 30-40 fuglar eru kring teirra bát alla tíðina.
Í Føroyum er vanligt at eta litlan valmása og valmása Larus hyperboreus, og tí havi eg havt møguleika at kanna nakrar av teimum lítlu valmásunum. Allir uttan ein vóru diddarak og um at doyggja í hungri.
Lítil valmási sæst í Føroyum á vetri og kanningar vísa, at vanliga eru 96% av teimum honir. Kynsbýtið í hesi innrásini er 80% hannar og 20% honir – og tað er nakað, eg aldri havi sæð áður. Eg ivist ikki í, at tær minnu honinar ofta eru við undirlutan, tá talan er um at kappast um føðina og at tær tí fara longur burtur at leita eftir føði, har kappingin ikki er so hørð. Tá nú hannanir eru komnir til Føroyar í so stórum tali, bendir alt á, at einki sum helst er at eta í Grønlandi. Teir eru bart sagt flýddir undan hungursdeyðanum; spurningurin er so, um teir hava nakran sum helst møguleika at lívbjarga sær her heima, havandi í huga, at fuglurin hevur svøltað tey mongu seinastu árini.
Ein tann størsti munurin á hesi innrásini og henni í 1983 er, at hesu ferð eru bert heilt fáir lítlir valmásar, ið líkjast tí vestara undirslagnum kumliensmása Larus glaucoides kumlieni; men teir másarnir koma kanska seinni. Kumliensmási er sera fjølbroyttur í útsjónd og stórur munur er á ymisku búnunum; men sum heild er ungfuglurin døkkur, meðan tann gamli fuglurin hevur myrkar tekningar á ytru flogfjaðrunum.

Legg til merkis høvuðlúsina av slagnum Saemundssonia (Saemundssonia) lari (O. Fabricius, 1780)

Les greinina hjá DOF "Grønlandsk kulde sender arktiske måger til Danmark"

Dimmur velreyði Phoenicurus ochruros

Tadorna cana

12. mai 2011 vitjaði hendan Tadorna cana dunnan í Tórshavn. Hon stavar upprunaliga úr Suðurafrika, so hendan er helst ein, ið er rýmd úr fangilsi úr onkrum av grannalondum okkara.

Fyri fyrstu ferð hevur blátíta Cyanistes caeruleus verið í Føroyum allan veturin 2010/2011

Fyri fyrstu ferð nakrantíð hava 4 stórtítur yvirliva veturin í Føroyum. Tað eydnaðist mær at ringmerkja eina av teimum.

12.09.2010 kom skipið Viking Lady inn á Runavík við einari ungari fiskiørn omborð. Hetta vísti seg at verða ein ungi frá í summar. Fiskaørnin kom í pleygu hjá Hans Eli Sivertsen á Argjum, har hon millum annað var gødd við makreli.

Jens-Kjeld Jensen ringmerkti ørnina 25.09.2010, og síðani var hon slept leys.

Krossnevini koma higar úr øllum Skandinavia vegna føðitrot í heimlandinum. Tey liva mest av fræ av grannkonglum, og finnast hesi ikki heima, leita tey út um landoddarnar í vón um betri.

Einki beinleiðis mynstur er at síggja í vitjanunum av snjóuglum í Føroyum og fráboðaninar eru heldur ikki skrásettar nágreiniliga.
Salomonsen (1963) skrivar um tilsamans fimtan, umframt at ein rættiliga innrás varð í 1955.
Müller sýslumaður (1863) skrivar hin vegin um eina snjóuglu frá umleið 1843 og so eina, sum hevði vetrarvist her í 1849-50. Hann nevnir eina, sum varð fangað í 1855, umframt at hann sama ár hoyrdi um fleiri kring landið.
Nú kann mann so ivast í, um Salomonsen er farin 100 ár av kós, tá hann hugsaði um innrásina í 1855 og so hevur skrivað 1955 í staðin?
Í oktober 1857 vórðu tvær snjóuglur sæddar nær Tórshavn, og ein varð sædd á sama stað 25. maj 1861.
Andersen (1901) skrivar, at Müller skjeyt ein gamlan hann nær Tórshavn 14. september 1863. Andersen (1897) skrivar eftir Petur á Botni: Nyctea nivea: Er fleiri ferðir sædd í Nólsoy umframt at ein er skotin har úti.
Salomonsen (1935): Ein bøga í Norðadali, Streymoy 18. juni 1897 og ein í Mykinesi 10. februar 1900.

Tummas Thomasen sá hendan kúhegran - sum er Føroya fyrsti - inni í Dalinum 28. september 2008. Tummas fortaldi Olevinus Sørensen, Viðareiði um hegran, og um døgverðatíð dagin eftir, sá hann eisini hegran á sama stað. Um kvøldið fleyg hegrin til Viðareiðis, og har sóu Tóri Simonsen og fleiri onnur hann. 30. september eydnaðist tað Tóra Simonsen at taka hesar báðar myndirnar.