07.2004

MEYRUR

við Jens-Kjeld Jensen, fuglaútstappara, Nólsoy.

Tey seinru árini eru fleiri meyrubúgv funnin í Tórshavn, og so vítt eg veit, er hetta eitt nýtt fyribrigdi.

Kring heimin finnast umleið 15.000 meyrusløg, og av teimum finnast umleið 50 í Danmark.

Eg veit um tvinni sløg, sum higartil eru funnin í Føroyum.

2 búgv eru funnin uttandura, har tann “sorte havemyre” (DK) var í, og eitt búgv var funnið innandura . Tey bæði fyrstu búgvini av meyrum eru komin til landið við ávikavíst einum runni og einum træi.

Tann “svarta havameyran” er frá 3 til 9 mm long. Vespur, meyrur og býflugur hoyra til sama hópin, sum á donskum eitur “årevinget”

Eitt meyrusamfelag líkist nógv einum vespusamfelagi í bygnaðinum. Bæði kvenn- og kalldýrini kunnu flúgva, meðan sterilu arbeiðarameyrurnar gera alt arbeiði. Tær kunnu ikki flúgva; men tuska aftur og framm, so skjótt tær kunnu!

Mann kann ikki beinleiðis siga, at meyrur eru til nakran skaða; men hin vegin eru tær væl heldur ikki til nakra gleði, og tað er sjálvandi óheppið, flyta tær inn í eini hús at búgva.

Hitt slagið av meyrum, ið var funnið, eitur “faraomyre” á donskum. Hetta er ein tropisk meyra, ið finst kring allan heimin; og har tað er kalt, finst hon bert innandura.

Hon livir av nærum øllum; men sera væl líkar henni alt søtt. Er mann so óheppin at hava fingið “faraomeyrur” í húsið, er næstan ógjørligt at sleppa av við tær aftur, tí tær spjaða seg sera skjótt.

Tær gera ikki nakran stóran skaða; men sjálvandi kann tað verða eitt sindur keðiligt at búgva saman við einum búgvi av “faraomeyrum”, ið kann húsa so mikið sum 300.000 meyrum. Og hóast arbeiðarameyrurnar bert eru 2-3 mm. langar, kunnu tær í stórari nøgd verða ein sonn plága.

Eg eri sjálvandi sera áhugaður í at hoyra nærri, skuldi onkur funnið eina meyru.