09.2003

HIGARTIL ÓKENDUR SNIGIL FUNNIN Í FØROYUM

við Jens-Kjeld Jensen, fuglaútstappara, Nólsoy.

Herfyri sendi Dagfinn Højgaard mær nakrar sniglar, sum hann hevði funnið á Svangaskari á Toftum. Hann helt ikki, at teir líktust morsniglinum (dreparasniglinum), og tað var eg fulkominliga samdur við honum í!

Sniglarnir hann hevði funnið, høvdu sera vakurt mynstur, og vóru eisini sera vakrir á liti. Vegna tað, at eg ongantíð hevði sæð tílíkar sniglar áður, setti eg meg í samband við norðmannin Torstein Solhøj, sum samlaði sniglar í Føroyum fyri umleið 25 árum síðani.

Teir flestu sniglar kunnu verða sera ymiskur á at líta, hóast teir eru av sama slag, og tí er tað ofta torført at eyðmerkja slagið. Torstein Solhøj kundi tó beinanvegin greiða mær frá, at hesir hoyrdu til slagið Limax macimus, sum á norskum eita Boasnegl.

Um mann hyggur í tey ymisku tíðarritini, verða hesir sniglar av slagnum L. macimus ofta kallaðir “leopardsnigil”, men sambært Dagfinn Højgaard hava bert 5 % av teimum blettar – hini 95 % hava strípur, so helst hevði tað verið betur at funnið eitt meira hóskandi føroyskt navn til teir.

L. macimus er heldur tynnri, við einum spískari afturparti enn morsniglin, og tí er lætt at kenna mun á teimum. Morsniglen er ofta bert 6-12 cm. til longdar, meðan L. macimus kan verða einar 20 cm. til longdar. Annars kunnu áhugaði lesa eina grein um morsniglilin í Frøði nr. 1/2003.

L. macimus finst sjáldan uttandura oman fyri breiddarstigið 61^o N. Og Dagfinn Højgaard viðmerkti eisini, at hann bert hevði sæð henda snigilin tey lýggju kvøldini.

L. macimus finst millum annað í Suðurnoregi, Suðursvøríki, Danmark, Írlandi og í Onglandi.

Hvussu leingi L. macimus hevur hildið til á Svangaskari, er ikki gott at vita; men helst hevur hann verið har í nøkur ár.

Vegna tað, at havafólk sjáldan eru sniglaserfrøðingar, er ikki óhugsandi, at tey stundum kunnu hava tikið feil, og hava hildið L. macimus verið morsnigil.

Sambært Dagfinni Højgaard hevur eingin heldur havt nakrar trupulleikar av L. macimus við Svangaskar um vit samanbera við trupulleikarnar, ið fólk hava av morsniglinum!

Eg eri sera áhugaður í at hoyra frá fólki, ið hava sæð henda snigilin Limax macimus, sum møguliga er vanligur aðra staðni í Føroyum?

Mynd nr. 3280

Her sæst tíðiliga, hvussu ymisk frábrigdini hjá Limax macimus eru!

Mynd: Jens-Kjeld Jensen

Mynd nr. 0372

Teir flestu Limax macimus við Svangaskar síggja soleiðis út.

Mynd: Marita Gulklett