03.2005

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Skúgvapisa merkt 27.06.1991 í Skúvoy. Fráboðað (fangað og slept aftur) í Skopun 23.06.2004.

Tjaldursungi merktur 22.06.2004 í Funningsfirði. Fráboðaður (og tikin í pleygu) á Isle of Skye, Scotland heystið 2004.

Gamal kjógvi merktur Á Krossi, Skálavík 21.06.2003. Fráboðaður aftur úr sama stað 15.06.2004.

Kjógvapisa merkt 09.07.1995 í Mykinesi. Fráboðað úr Akrabyrgi 17.06.2004.

Skúgvapisa merkt 03.07.2002 í Skúvoy. Skotin í Nólsoy 23.09.2004.

Gamal náti merktur 05.07.2003, Vest Tampen Banki. Skotin 11.02.2004 á leiðini 61.35N-6.35W.

Likkuskuri merktur við litringum 13.07.2000 í Selskarð, Álftanes, Garðabær, Ísland. Litringurin var kannaður og fráboðaður aftur av leiðini 61.00N – 5.20W tann 05.06.2004.

Likkuskuri merktur við litringum 16.07.1998 í South Walney, Cumbria, England. Litringurin var kannaður og fráboðaður aftur av leiðini 59.58N-3.12W tann 07.05.2004.

Likkuskuri merktur við litringum 03.07.1998 í South Walney, Cumbria, England. Litringurin var kannaður og fráboðaður aftur av Bill Baily Bank tann 25.05.2004.

Mynd: Guy Morrison

Tekstur til mynd: Guy Morrison við einum litringmerktum tjaldursgrælingi í Alert.

Tann 09. apríl 2005 sá Rodmund á Kelduni ein litringmerktan tjaldursgræling á sandinum í Miðvági.

Tjaldursgrælingurin var merktur av Guy Morrison 29. mai 2003 í Alert, sum liggur á norðurendanum av Ellesmere Island í Canada (82 30N 62 20W).

Tjaldursgrælingurin var ein gomul bøga í prýðisbúna, sum vigaði 136 g. Guy hevði fangað hana við at skjóta eina rakett við einum neti á inn yvir ein lítlan flokk av 8 tjaldursgrælingum og 3 íslandsgrælingum. Av hesum 11 fuglunum hevur Guy bert fingið tvinnar fráboðanar aftur um, at ein tjaldusgrælingur var sæddur í Frankaríki, og ein íslandsgrælingur var sæddur í Hollandi.

Guy Morrison hevur litringmerkt tjaldusgrælingar í Alert í fleiri ár, og higartil eru hesir fuglarnir fráboðaðir aftur frá norðan úr Íslandi, yvir Føroyar, Ongland, Holland, Belgien, Frankaríki, Portugal, Spanien, og so langt niðri frá sum úr Namibia. Hetta er ein dekan og langur teinur at flúgva – heilt frá Alert í ein útnyrðing úr Grønlandi og so niður til Suðurafrika.

Tann tjaldursgrælingurin, sum er sæddur í Namibia, er fráboðaður aftur úr sama stað fleiri ár á rað á vetri, og tað sama ger seg galdandi við fleiri av hinum fuglunum, sambært Guy. 

Næstu ferð, tú sært ein tjaldursgræling, legg so til merkis, um hann er litringmerktur. Skrivað síðan nágreiniliga, í hvørjari raðfylgju litringarnir sita – oftast er talan um einar 6 ymiskar litringar.