08.2004

ONGSPRETTA Schistocerca gregaria FUNNIN Í PORKERI

við Jens-Kjeld Jensen, fuglaútstappara, Nólsoy.

Í seinastu viku skrivaði eg um meyrur, og hesa ferð er talan um ongsprettu – hvat verður tað næsta?

Tann 22. august fangaði Tóki Brattalíð eina livandi ongsprettu (dk. græshoppe) í Porkeri. Tað var als ikki neyðugt at hava góð eygu, fyri at leggja til merkis hana, tí hon var næstan 7 cm til longdar og hevði eitt flog á 11 cm!

Helst hoyrir henda funna ongsprettan til slagið, ið á donskum eitur ”ørkenvandre græshoppe”; men eg kann ikki siga tað fyri vissu, fyrr enn ein ”ongsprettufrøðingur” hevur kannað hana gjøllari.

”Oyðimarkarongspretta” finst í tí turra Norðurafrika, har hon kann verða ein sonn plága.

Í 1998 vóru nógvar “oyðimarkarongsprettur” funnar í Caribbean islands, sum liggja í eini fjarstøðu av umleið 4500 km frá Norðurafrika.

“Oyðimarkarongsprettur” verða ofta nýttar sum livandi fóður at ambæta skriðdýrum og tílíkum við.

Hvussu umrødda ongspretta er komin til Porkeris, er ikki gott at vita! Mann hon vera flogin allan vegin úr Norðurafrika og hagar? Ella kann hon verða rýmd úr fangaskapi?

Hetta er fyrstu ferð, at eg havi hoyrt um eina tílíka ongsprettu í Føroyum; men veit nakar seg hava sæð nakra aðra ongsprettu her á landi, hevði eg fegin vilja hoyrt nærri!