05.2004

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Gamal lomvigi merktur 15.7.2003 á Sule Skerry, Orkney. Skotin norðan úr Mýlingi 22.11.2003.

Lomvigarpisa merkt 14.7.1986 á Isle of Canna, Scotland. Skotin 10 míl norðan úr Eiðiskolli 12.10.2003.

Lomvigarpisa merkt 5.7.2003 á Isle of Canna. Skotin 3 míl eystan úr Nólsoy 01.11.2003.

Svartbakaskuri merktur 29.6.2003 á Surtsey, Vestmannaeyjar. Skotin í Nólsoy 25.9.2003.

Gomal lundi merktur 20.6.2002 á Isle of May, Scotland. Skotin eystan úr Suðuroyarfirði 16.10.2003.

Gomal lundi merktur 2.7.2001 á Sule Skerry, Orkney. Skotin eystan úr Suðuroyarfirði 16.10.2003.

Gomul álka merkt 7.7.1996 í Stórhøfði, Vestmannaeyjar. Skotin sunnan úr Skorini, Borðoy 17.10.2003.

Skúgvapisa merkt 18.7.1999 á Fair Isle, Scotland. Skúgvurin var funnin deyður í Ambadali, Eysturoy 25.6.2003.

Munkur merktur 20.9.2003 nær við Icklesham, Sussex, England. Fangaður av kettu (men ikki dripin) í Sandi 19.10.2003. Hesin munkurin hevði flogið umleið 1300 km - sum er fjarstøðan millum Ongland og Føroyar - í tíðini 29 dagar.

Mynd: Orange 899.

Myndatakari: Mike Harris

Á hvørjum ári verða um 300 lomvigarpisur litmerktar á skotsku oynni Isle of May.

Mike Harris, er ein tann kendasti serfrøðingurin innan lunda og lomviga, og hann var sjálvur við til at litmerkja hesa lomvigarpisuna, sum eg her vil skriva nakrar reglur um.

Ein lomvigarpisa fekk ein stálring um tað vinstra beinið og ein appelsingulan plastikkring við talinum nr. 899 á tað høgra beinið í juni mánaða 1992. Fyrstu ferð, lomvigarbøgan sást aftur, var í 1997 á júst sama stað, har hon var vorðin merkt sum lítil pisa; men hon varp ikki. Hetta endurtók seg so í 1998. Í 1999 sást hon bøla einum eggi. Í 2000 sást hon ikki; men 11. februar 2001 var hon funnin innsmurd í olju nær við Brighton í East Sussex. Tann neyðars lomvigarbøgan var diddarak og vigaði bert 625 g, tá hon var send til eina “fuglapleygudeild” í Mallydams Wood, hvar hon var vaskað og fekk mat. Tann 15. mars var hon komin nakað fyri seg og vigaði 830 g, men tað var als ikki nóg mikið til at hon kundi lívbjarga sær sjálvari, um hon tá var sett út aftur. Tí var hon síðani send til eina aðra “fuglapleygudeild” í Portland Harbour saman við 9 øðrum lomvigum, og 29. mai vigaði hon 920 g, og tá var hon slept út aftur í náttúruna saman við 11 øðrum lomvigum.

Orange 899 - sum hon var kallað - var sædd aftur í sínum gamla reiðri á Isle of May 30. juni 2003 saman við einari pisu.

Søgan um Orange 899 hevur lært okkum, at hóast ein fuglur er oljudálkaður (og alt sær svart út), so loysir tað seg at royna at vaska honum, og tað er ómakin vert!