12.2003

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Skúgvapisa merkt 2.7.1994 nær við Saksun. Funnin deyð í Hørnum Odde, Nordfr. Inseln. Schl. Hol., Týskland 30.10.2000.

Gamal náti merktur 10.1.1992 á leiðini 10 míl norðan úr Fugloy. Fráboðaður av einum norskum fiskimanni, um borð á einum norskum línubáti 13 míl sunnan úr Akrabyrgi 18.1.2003.

Drunnhvíti merktur 18.8.2001 norðuri á Boga, Nólsoy. Fráboðaður úr Mikladali 28.8.2002.

Nátaungi merktur 13.7.1986 á Fair Isle. Ringurin var funnin í Mykinesi 11.4.2003.

Nátaungi merktur 26.7.1996 í Hunda, Burray, Orkney. Skotin í Rituvík 22.2.2003.

Nátaungi merktur 18.7.2002 í Sule Skerry, Orkney. Fleygaður í Skálhøvda 3.9.2002.

Lomvigarpisa merkt 26.6.1992 í Sumburgh, Shetland. Funnin deyð í Nólsoy 27.3.2003.

Gamal náti merktur 5.10.2002 á leiðini 4 míl í ein útnyrðing úr Streymoy. Fráboðaður av einum norskum fiskara av Otterbank, ið liggur í ein útnyrðing úr Shetlandi 3.3.2003.

Gamal náti merktur 3.10.1999 á leiðini 10 míl norðan úr Fugloy. Nátin druknaði á eini línu eystan úr Nólsoy 19.3.2003.

Gamal náti merktur 7.9.2002 í Viðareiði. Fleygaður 15 míl eystan úr Viðoy 11.4.2003.

Síðan 1912, tá byrjað var at ringmerkja fugl í Føroyum, og til 31.12.2002, eru tilsamans 4338 nátar vorðnir merktir.

Aftur í ár var Poul Johannes Simonsen úr Hvannasundi “ringmerkjarin mikli”, og bert í ár hevur hann (higartil) verið við til at merkja umleið 1200 gamlar nátar.

Hóast 7 nátar eru umrøddir í hesi greinini, er tað ikki vanligt at fáa fráboðanir aftur um ringmerktan náta. Sambært enskum hagtølum hava teir ringmerkt um 100.000 nátar, og av teimum eru bert 1,3% fráboðaðir aftur!

Tað er løgið at hugsa sær, at hóast Poul Johannes skuldi fylt 100 ár, so kann væl verða, at hann tá enn fær fráboðanir aftur um náta, sum hann hevur ringmerkt í 2003...

UMRÁÐANDI: Tá vit kunnu vænta, at bert 1 av 100 ringum verður fráboðaður aftur, er umráðandi, at tín ringur eisini verður fráboðaður! Hann hevur nógv at týða fyri hesa verkaætlanina.

Tekstur til mynd: Poul Johannes ringmerkir

Mynd: Jan Andries van Franeker.