10.2003

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Likkuskuri merktur bæði við vanligum ringi umframt litringi 19.07.2000 nær Selskarð, Álftanes, Garðabær, Ísland. Litringurin var fráboðaður av leiðini 61.33N – 7.12W tann 20.07.2002, tá ein maður um borð á Fríðborg hevði eygleitt likkuna við kikara.

Ungur grátítlingur merktur 15.08.2002 í Søltuvík. Hesin var fangaður av einum mása á Munkagrunninum 02.10.2002 sambært einum av manningini um borð á einum enskum skipi.

Drunnhvíti merktur 11.08.2002 í Salthøvda, Sandoy. Fráboðaður úr Hornøya, Finnmark, Noreg 26.08.2002.

Drunnhvíti merktur 27.08.2001 í Faraid Head, Sutherland, Skotland. Fráboðaður úr Borgini við Skálavík 09.08.2002.

Drunnhvíti merktur 19.08.00 nær Kråkenes Fyr, Vågsøy, Sogn og Fjordane, Noreg. Fráboðaður úr Borgini við Skálavík 09.08.2002.

Drunnhvíti merktur 08.08.1994 á Fair Isle, Scotland. Fráboðaður úr Salthøvda, Sandoy 11.08.2002.

Skúgvapisa merkt 19.07.2002 á Heiðafjalli, Skalavík. Funnin deyð nær Plozevet, Finistère, Bretagne, Frankaríki umleið tann 15.10.2002.

Títlingskongur merktur 11.09.2002 í Sumba. Doyði, tá hann fleyg í ein rút í Norðurlandahúsinum í Tórshavn 05.10.2002.

Tjaldursungi merktur 28.05.2002 við Sandsvatn. Tjaldrið var fráboðað úr Waterfoot, Annan, Dumfries & Galloway, Skotland tann 31.05.2003.

Ompil merktur 28.08.1996 á Flatadrangi. Skotin sunnan úr Borðuni 15.05.2002.

Mykinesmenn hava nú í mong ár ringmerkt omplar, tá teir hava farið eftir grásúlu. Tað sama var gjørt í ár, tá teir ringmerktu 72 omplar íalt.

Tann 26. august tóku mykinesmenn 35 grásúlur á Flatadrangi. Og 9. september var farið út í Hólmin eftir grásúlu. Tá vórðu einans 300 grásúlur tiknar, tí tær flestu vóru longu floygdar tá.

Hóast bæði lundin og nátin hevur vorpið yvir eitt drúgt tíðarskeið í summar - helst vegna væntandi føði, sær út til, at støðan hjá súluni hevur verið góð, eins og árini frammanundan.

Tekstur til mynd: Grásúla

Mynd: Jens-Kjeld Jensen.