06.2003

NÝTT FIRVALDASLAG FUNNIÐ Í SUMBA

við Jens-Kjeld Jensen, fuglaútstappara, Nólsoy.

Í Sumba búgva tvær systrar – Sissal og Gudbjørg Poulsen, sum hava ein stóran áhuga í øllum, ið hendur í náttúruni.

Tann 5. aug. spældi Gudbjørg í einum gomlum bussi í Sumba, og sum altíð, hevði hon eitt vakið eyga við tí, ið fyrifórst uttanfyri.

Mitt í øllum sá Gudbjørg ein nýliga deyðan firvald, hvørs flog fevndi um 85 mm. Gudbjørg fór beina leið heim til hús við honum og gav hann síðani til pápabeiggjan Aksal Poulsen, som sendi hann til mín.

Firvaldurin líkist einum “blendingi” av drotningarfirvaldi og kongsfirvaldi, sum er funnin nakrar ferðir her á landi. Men hesin, sum Gudbjørg fann, var hvørki drotningar- ella kongsfirvaldur; men ein hon av slagnum Hyles livornica, sum hoyrir til somu familju. Hann hevur sjálvsagt einki føroyskt navn enn; men á enskum eitur hann Striped Hawkmoth, sum kann týðast til “stríputur drotningarfirvaldur”.

Hetta er fyrstu ferð, at Hyles livornica er funnin í Føroyum. Hann livir í sunnasta partinum av Europa og Afrika, har hann er heilt vanligur, og hann er sjáldan funnin í Norðurlondum.

Tekstur til mynd: Firvaldurin (Hyles livornica) úr Sumba. Sum sæst á myndini, er hann sera slitin av tí langa túrinum, hann hevur flogið.

Mynd: Jens-Kjeld Jensen.