04.2003

 

Ternupisurnar deyðar í Nólsoy.

 

við Jens-Kjeld Jensen, fuglaútstappara, Nólsoy.

 

Seinastu dagarnar hevur verið at hoyrt, at illa stendur til við lundanum í ár, og síðsti  fleygadagur í Urðini í Nólsoy higartil var tann 17. juli.

Seint í síðstu viku, umleið tann 26. juli, doyðu so eisini so gott sum allar ternupisurnar í Stokkvík, sum liggur beint norðan úr sjálvari bygdini Nólsoy. Terna hevur altíð vorpið har; men sjáldan í so stórari nøgd sum í ár. Mett var, at minst 300 pør hava vorpið har í summar, og so mangar hava ikki verið at sæð har síðan eina ferð í sjeytiárunum.

Tær deyðu ternupisurnar vóru ymiskar í stødd, men tær flestu vórðu nærum floygdar. Leygardagin taldu vit um 150 deyðar pisur, og vit sóu bert eina á flogi! Vit funnu bert 7 livandi pisur; hinar vóru allar deyðar í hungri!

Tað var so tætt millum tær deyðu pisurnar, at vit máttu ganga í gásargongd fyri ikki at traðka á tær...

Føðitrot er helst eisini orsøkin til, at eingin lundi er fleygaður í Nólsoy síðani 17. juli, so helst fara nógvar lundapisur at líða somu lagnu; men hetta vita vit vónandi, tá henda vikan er úti?

 

Tekstur til mynd 1: Torlakkur á veg heim úr Urðini í Nólsoy við seinastu lundabyrðuni tann 17. juli 2003.

Mynd: Marita Gulklett.

 

Tekstur til mynd 2: Deyðar ternupisur í Nólsoy, summarið 2003.

Mynd: Jens-Kjeld Jensen.

 

Tekstur til mynd 3: Deyðar ternupisur í Nólsoy, summarið 2003.

Mynd: Jens-Kjeld Jensen.