03.2003

SKJÓRUSPANNARI.

við Jens-Kjeld Jensen, fuglaútstappara, Nólsoy.

Skjóruspannari hevur áður verið sera sjáldsamur at sæð her á landi, og áðrenn 26. juni í ár var hann bert funnin 3 ferðir. Síðani eru umleið 25 skjóruspannarir fangaðir kring landið, harav teir flestu í Nólsoy.

Skjóruspannari er eisini sjáldsamur í Hetlandi. Tað áhugaverda er, at í ár vórðu teir fyrstu sæddir har tann 25. juni, ella dagin fyri, at tann fyrsti var fangaður í Nólsoy. Man kann rokna við, at teir sum koma til Føroyar og Hetlands, koma úr Skotlandi ella Bretlandi. Flogið fevnir umleið 35 mm, so skjóruspannarin er tann størsti spannarin, sum er funnin her á landi. Navnið spannari sipar til gongulagið á ormveruni. Tá ormveran gongur, hálar hon framkroppin framm, og setur síðani tey aftastu beinini við síðuna av frammbeinunum, tí sær tað út, sum um hon spannar seg framm eftir blaðnum. Ormveren livir vanliga á bløðunum á stikkulsberjarunni; men fleiri av teimum, sum eru sæddar her, hava sitið á bløðunum á sponskum hindberjarunni.

Ikki er óhugsandi, at skjóruspannari fer at verpa og liva veturin av her í Føroyum; men hetta fer tíðin at vísa!

Skjóruspannarin sæst frá sumri og út á árið; meðan ormverurnar síggjast um heystið og á vári. Á vetri fara ormverurnar í vetrarvist, og koma so framm aftur á vári.

Tað kundi verið áhugavert at hoyrt frá fólki, sum antin hava sæð skjóruspannaran ella ormerurnar, sum hava tann sama litin sum tann vaksni spannarin.