02.2003

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Drunnhvíti merktur 15.8.1982 í Skomvær, Røst, Noreg. Fráboðaður úr Nólsoy 11.6.02.

Drunnhvíti merktur 3.8.1996 Suðuri í Dølum Nólsoy. Fráboðaður úr Ulsta, Yell, Hetlandi 10.7.2000.

Tjaldursungi merktur 30.06.1992 í Lopra. Dripin á Foula, Hetlandi tann 14.04.2002.

Tjaldursungi merktur 15.7.2002 í Akrabyrgi. Funnin deyður í Menai Strait, Bangor, Gwynedd, Caernarvon, Wales 7.11.2002.

Fiskimásaskuri merktur 30.6.2002 í Klaksvík. Skotin í Nólsoy 12.10.2002.

Gomul rita merkt 9.3.2000 10 míl norðan úr Viðoy. Fleygað vestan úr Sandoynni 5.3.2003.

Gomul likka merkt 11.8.1995 í Nólsoy. Fráboðað úr Porkeri 6.8.2002.

Lundapisa merkt 26.7.1996 í Borðutorvu, Bøur. Fleygað Norðuri á Skorðum, Skopun tann 15.7.2000.

Lundapisa merkt 26.8.1997 í Mykinesi. Fleygað í Stóra Dímun 18.7.2002.

Skúgvapisa merkt 19.7.2002 á Heiðafjalli, Skálavík. Funnin deyð nær Plozevet, Finistére, Bretagne, Frankaríki 15.10.2002.

Myndatakari: Ditlev Róin

Tekstur undir myndina: Helsigæs i Fuglafirði

Tekstur:

Helsigás sæst javnan í Føroyum. Hesar á myndini vórðu avmyndaðar í Fuglafirði í 1996. Síðsta ár hildu fleiri hundrað helsigæs til í Miðvági í eina viku.

Flestu av helsigæsnum, ið síggjast her, stava úr einum ávísum bøli, sum telur 20.000 gæs. Hesar gæsnar verpa í arktiska Canada og hava vetrarvist í Írlandi. Tær flestu av teimum flúgva suður um Føroyar, tá tær venda heim aftur til Canada. Á vegnum heim steðga tær altíð nakrar dagar í Íslandi, har tær eta sær megi til tann langa flúgvitúrin yvir innlandsísin.

Í mai 2002 fangaðu menn 40 helsigæs nær við Reykjavík og ringmerktu tær. Á 6 av teimum størstu kallgæsnum vóru festir satellitsendarir á ryggin á teimum. Hesar kalgæsnar fingu heitini: Oscar, Arnthor, Austin, Hugh, Major Ruttledge og Kerry.

Hetta er so tað, vit vita um tær 6 gæsnar 1 ár seinni:

Oscar kom ikki longur enn til ein útnyðring í Íslandi, har hann helst var dripin av einum veiðifalki.

Arnthor fleyg yvir innlandsísin í Grønlandi; men var so skotin av einum grønlendingi, sum var farin út við byrsuni í Disko víkini.

Austin, Hugh, Major Ruttledge og Kerry komu allir vegin framm til bølini í tí fjarskotnu Canadisku frostmýrini, har polar revarnir eru ein stór hóttan hjá teimum. Teir kanadisku fuglafrøðingarnir undraðust stórliga yvir, at Kerry helt til í einum lítlum niðurseturplássi nevnt Resolute Bay. Tá fuglafrøðingarnir so fóru undir at kanna meira nágreiniliga, hvar ljóðið frá sendarinum hjá Kerry kom frá, vísti tað seg, at Kerry lá í eini frystiboks í køkinum hjá einum eskimoara, sum hevði skotið hann saman við fleiri øðrum fjaðursárum helsigásum.

Austin misti sendaran á Ellesmere Island, men vendi helst aftur til Írlands.

Battaríini hjá Hugh og Major Ruttledge’s vóru nærum tóm, tá teir vendu aftur til Írlands á heysti, og tað síðsta signalið menn fingu, var frá Hugh, tá hann var staddur á leiðini Castle Espie, ið liggur nær norðaru strondunum í Strangford Lough í Írlandi.