10.2002

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Ung kvørkveggja merkt 28.7.1998 í Nólsoy. Funnin deyð í Rituvík 30.3.02.

Ternupisa merkt 2.7.1987 í Funningsfirði. Funnin deyð á Fair Isle 1.7.01.

Drunnhviti merktur 26.7.1990 Norðuri á Boða í Nólsoy. Funnin deyður á Beacon Isle, Plettenberg Bay, W. Cape, South Africa. 25.4.02

Ompil merktur 6.9.1991 í Mykineshólmi. Skotin í Nólsoy 26.3.02

Tjaldursungi merktur 30.6.1992 í Suðuroy. Funnin deyður á Foula 14.4.02.

Kjógvi merktur 20.6.1999 í Mykinesi. Fráboðaður úr sama stað 29.6.02.

Kjógvi merktur 15.6.1994 í Akrabergi. Fráboðaður úr sama stað 7.6.02.

Kjógvi merktur 16.6.1999 í Sandvík. Fráboðaður úr sama stað 5.6.02.

Drunnhvíti merktur 25.8.1998 Suðuri í Dølum, Nólsoy. Fráboðaður úr Tjørnudalsá, Skúvoy 20.8.02.

Likkuskuri merktur 28.5.1986 á Glyvursnesi, Streymoy. Skotin í Tórshavn 25.5.02.

Lundapisa merkt 27.7.1999 í Borðutorvu, Bøur. Fleygað í Bíggjarskor, Bøur 12.7.02.

Lundapisa merkt 11.8.1997 í Urðini í Nólsoy. Fleygað sama stað 10.7.02.

Lundapisa merkt 4.8.2000 í Mykinesi. Fleygað á Heimara Nesi, Mykines 5.8.02.

Gamal lundi merktur 2.7.1992 í Mykinesi. Fleygaður á Heimara Nesi, Mykines 5.8.02.

Lundapisa merkt 19.8.1994 í Mykinesi. Fráboðað úr Undir Rógvuni, Mykines 24.7.02.

Lundapisa merkt 27.7.1999 í Borðutorvu, Bøur. Fleygað í Kollaurðini, Tindhólmur 16.7.02.

Mynd: Nólsoyarlundar.

Myndatakari: Jens-Kjeld Jensen

Fyri stuttari tíð síðan fekk eg eitt teldubræv úr Noregi frá mínum góða vini, lundaserfrøðinginum Dr. Tycho Anker-Nilssen, har hann greiðir frá lundafráboðanum og annars sigur frá, hvussu gekst við verpingini sum heild hjá búfuglinum á oynni Røst í Lofoten í summar. Her er hansara sera áhugaverda teldubræv leysliga umsett:

”Norski ringmerkti lundin (Oslo nr MA02363), sum var skotin eystan úr Nólsoy 8. jan. 1997, var ringmerktur í Hernyken, Røst tann 5. mai 1982, sum fullvaksin fuglur (3 nevrivur, 525 gram). Higartil hava vit bert fingið 9 fráboðanir aftur aðra staðni frá enn úr Røst (5 úr Føroyum, 2 úr Skotlandi, 1 úr Írland og 1 úr Íslandi), hóast vit hava merkt umleið 6700 vaksnar lundar síðan 1979!

Viðvíkjandi verpingini hjá búfuglinum í Røst var árið framúrskarandi gott: Sildin var størri, enn vit nakrantíð hava sæð hana (meðal longd 1. juli næstan 63 mm !) og 92% av ungunum komu undan. Alíkavæl minkaði búfuglastovnurin við 15%; men nú seta vit okkara lít á 3 tey seinastu av 4 sera góðum árum. So tey komandi árini verða sera spennandi!

Lomvigin hevði tað ikki gott; men hetta geldur mest fyri tann fuglin, sum varp á tann vanliga háttin á rókunum á teimum steyrrættu fjallaveggunum í høvuðsbølinum á Vedøy. Lomvigin, sum varp í stórum urðargróti, hevði tað gott, hóast vit ikki hava nágreinilig tøl yvir stovnin; men hann hevur tað nógv betur og er í stórari framgongd. Eisini er stovnurin av lomviga, sum verpur á rókunum, ov lítil til at verja seg móti ravni og ørnum. Onkran dagin eygleiddu vit so mikið sum 30 havørnir í luftini fram við rókunum...

Ritirnar á Vedøy høvdu tað ikki gott (undir 0.4 pisa/reiðrið), og hetta undrar meg, havandi í huga ta stóru tilgongdina av sild. Og tað avbera góða veðrið, við 5-6 hitastigum hægri enn vanligt, so gott sum ongum vindi og sól næstan hvønn einasta dag alt summarið, tyktist heldur ikki hava nakra ávirkan. Í einum lítlum bøli á einum lítlum hólma úti við Hernyken, gekk tað betur (yvir 0.9 pisa/reiðrið), hetta prógvar eisini, at hesin fuglurin er ikki í so stórum vanda at enda sum rovfuglaføði, sum fuglurin í høvuðsbølinum á Vedøy!

Skarvurin hevði eitt metár, og stovnurin er vaksin við 30% síðani í fjør, sum annars var metár frammanundan.

Eisini frøðast vit yvir, at tað bølið av hiplingum, sum fyri fyrstu ferð sóust á Røst í 1997, nú telur 69 verpandi pør. Vit merktu 100 stórar ungar, og máttu gevast, tí vit ikki høvdu fleiri ringar.”