06.2001
Í HESUM VESPUTÍÐUM........
við
Líka síðani november mánaða havi eg javnan
fingið sendandi bæði livandi og deyðar vespudrotningar umframt at eg eisini
havi hoyrt um fleiri aðrar, sum eru funnar.
Tær flestu hava verið av tí "vanligu
vespuni" Paravespula vulgaris. Hetta
var tað slagið, sum gjørdi rættiliga nógv um seg í miðbýnum í Tórshavn í 2000.
Men 1 drotning av slagnum "týska vespan" Paravespula germanica er somuleiðis fangað í einum sethús á Sandi,
hetta er tað vespuslagið, sum gjørdi um seg í Gundadali í 1999.
Tær vespudrotningarnar, sum verða at
síggja frá nú av og komandi mánaðin eru allar fullar av troðnum eggum, og til
reiðar at seta egið búgv í nýggjum bøli!
Heilt fram til august mánaða hevur øll
vespufamiljan úr at gera við at byggja bølið størri og at ansa teirra børnum -
ormverunum - sum verða tær komandi vespudrotningarnar.
Tí fer man ikki at leggja so nógv til merkis til tær teir komandi mánaðirnar,
men frá í august mánaða verður støðan helst
ikki mætari enn síðsta ár - og tá verður
ikki lukkuligt at búgva í Tórshavn!
Annars kunnu tey, (sum lesa hesa grein, og) sum
eru áhugaði í at lesa meira, keypa tíðarritið "FRØÐI", sum kemur út
skjótt - har stendur meira um "eitt vespulív".
Eg eri enn áhugaður í at fáa vespur
sendandi til tess at fáa staðfest, hvussu nógv sløg munnu fara at verða í
Føroyum.
N.B. Orðatakið sigur, at "einki er so ringt, at tað ikki er gott
fyri okkurt" - munnu húsaprísirnir á bygd nú ikki fara at hækka?
Tekstur til mynd: Vespudrotning av slagnum
"vanlig vespa" (Paravespula
vulgaris). Hon er deyð og gjøgnumgatað av eini nál - og soleiðis munnu tey
flestu helst ynskja allar vespurnar at verða! Hendan var fangað í Tórshavn
februar 2001.
Myndatakari: