07.1999

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Lomvigarpisa merkt 22.6.1998 á Fair Isle, Scotland. Skotin nær Borðoy 18.11.1998.

Lomvigarpisa merkt 24.6.1997 á Fair Isle. Skotin norðan úr Mýlingi 5.10.1998.

Nátungi merktur 27.8.1993 á leiðini 8 míl norðan úr Viðoynni. Skotin í ein útssynning úr Sandoynni 9.1.1999.

Drunnhvíti merktur 4.9.1996 Norði á Boða, Nólsoy. Fráboðaður frá Brough of Birsay, Orkney 21.7.1998.

Drunnhvíti merktur 3.8.1997 Suðuri í Dølum, Nólsoy. Fráboðaður frá Vatsetter, Yell, Shetland 17.7.1998.

Gamal náti merktur 4.9.1993 umleið 10 míl í ein landssynning úr Svínoynni. Fleygaður á Eysturhøvða, Svínoy 24.4.1999.

Gamal stari merktur 24.9.1993 í Klaksvík. Funnin deyður í Klaksvík 15.6.1999.

Staraungi merktur 11.6.1998 í Nólsoy. Funnin deyður í viðarlundini í Tórshavn 14.5.1999. Hetta er ein av teimum fáu av teimum tilsamans 2500 starunum, sum eru merktir í Nólsoy, sum er funnin aðra staðni enn í Nólsoy.

Gráspurvaungi merktur 7.6.1998 í Nólsoy. Funnin deyður í Tórshavn 10.5.1999.

Ungur stari merktur 14.9.1990 í Nólsoy. Funnin deyður sama stað 2.4.1999, næstan 9 ár seinni. Hetta má sigast at verða ein gamal føroyskur stari.

Munkur merktur 12.5.99 í Nólsoy. Funnin deyður nær Lágargarð í Tórshavn 19.5.1999.

Likka merkt 2.7.1988 á Tvøroyri. Funnin deyð í Hvalba 11.6.1999.

Skúgvi merktur sum pisa 7.7.1977 í Noss, Hetlandi. Skotin úti í Koltri summarið 1998.

Óðinshani merktur 18.4.1998 í Melvich, Highland Region, Skotland. Beinið á honum við ringinum á var funnið í Froðba 1.6.1999.

Tjaldur merkt 8.8.1998 í Waterfoot, Annan, Skotland. Funnið deytt í Kollafirði 18.4.1999.

2 ára gamalt tjaldur merkt 29.9.1989 í Dawlish Warren, Exe, Devon, England. Funnið deytt í hafti nær Oyri umleið tann 15.8.1998.

Tekstur til myndina: Munkur, kallfuglur

Mynd: J-K. Jensen.

Hesin avmyndaði munkurin var millum teir mongu, ið komu til Føroyar í heyst. Sum eg áður havi skrivað, eru munkarnir frá Miðeuropa farnir at hava vetrarvist í serliga Onglandi. Í Miðnoregi síggjast teir eisini á vetri.

Eg eri ógvuliga áhugaður í at fáa at vita, um onkur av lesarunum hevur nakran munk í havanum í løtuni. Hóast munkurin, eins og hinir songfuglarnir, livur av flogkyktum um summarið, hálsar hann um á vetri, og etur tá bæði ber og ymisk fræ.

Donsk ringmerking vísir ein løgnan atburð hjá donsku munkunum. Munkarnir sum verpa í Jyllandi fara í vetrarvist í Spaniu og Norðurafrika, meðan munkarnir av Sælandi ferðast í ein landsynning runt Miðjarðarhavið, og halda síðani leiðina fram til Miðafrika, hvar teir hava vetrarvist.