GRØNIR SANGARIR Á VITJAN Í NÓLSOY

06.1999

GRØNIR SANGARIR Á VITJAN Í NÓLSOY.

Við Jens-Kjeld Jensen, fuglaútstappara, Nólsoy.

Aftur í ár hevur rúsan hjá Náttúrugripasavninum í Nólsoy fangað ymiskar sjáldsamar fuglar. Í seinra helmingi av september og í byrjanini av oktobur mánaða vórðu millum aðrar eisini hesir umrøddu 4 grønu songfuglarnir fangaðir og ringmerktir.

Hesir grønu sangarir eru sera líkir, og vanliga hátturin at kenna munin á teimum er at lurta eftir tí ymiska látinum á tí einstaka fuglinum fyri at kunna kenna teir frá hvørjum øðrum, tí vanliga syngja ella láta teir alt summarið í verpingartíðini. Trupulleikin hesa tíðina á árinum er so sjálvandi hann, at songfuglarnir tá næstan eru tagnaðir. Einasti máti at kenna teir frá hvørjum øðrum er at halda teir í hondini, og so leggja til merkis smámunin teirra millum. Og her ger fellan veruliga gagn - eisini hjá fuglaáhugaðum í londunum kring okkum.

Mynd 1: Leyvljómari finst í øllum Norðureuropa og Norðurruslandi. Hann hevur vetrarvist sunnan fyri Sahara og so langt suður sum til Suðurafrika. Nakrir fáir leyvljómarar síggjast á hvørjum ári í Føroyum. Fyri nøkrum árum síðani fangaði og ringmerkti eg ein leyvljómara í Nólsoy, sum var fráboðaður 7 dagar seinri úr Ermarsundi.

Mynd 2: Grønljómari finst í øllum Norðureuropa og eitt fitt petti inn í Norðurrusland. Hann hevur vetrarvist í Miðafrika. Grønljómari er fráboðaður 17 ferðir í Føroyum. Tann fyrsti var fráboðaður í árinum 1903.

Mynd 3: Nilksljómari finst í Ruslandi og Kina, so vit kunnu við vissu siga, at hansara næsta verpingarstað liggur í 3000 kilometra fjarstøðu úr Føroyum. Hann hevur vetrarvist í Indien, Burma og annars í meginpartinum av Landsynningsasia. Ein nilksljómari var funnin deyður í Eiði umframt at aðrir fýra vóru ringmerktir í Nólsoy í oktobur mánaða. Tilsamans er nilksljómari fráboðaður umleið 30 ferðir í Føroyum.

Mynd 4: Hermiljómari finst í Suðureuropa og Norðurafrika. Næsta verpingarstað er í Norðurfrankaríki. Hann hevur vetrarvist í Vesturafrika. Hetta er fyrsta fráboðanin í Føroyum um hermiljómara, og sjálvandi er hann eisini tann fyrsti av sínum slag, sum er vorðin ringmerktur her á landi.