03.1999

 

RINGMERKINGARFRÁBOÐANIR

 

við Jens-Kjeld Jensen, fuglaútstappara, Nólsoy.

 

Gomul rita merkt 30.5.1984 á Hornøya, Vardø, Finnmark. Fleygað á Føroyabanka 15.3.1997.

Gamal náti merktur 15.4.1993 10 míl norðan úr Viðoynni. Fleygaður nær Svalbard umleið tann  4.12.97. Hetta er fyrsta fráboðanin um føroyskt merktan fugl úr Svalbard.

Gamalt tjaldur merkt 8.6.1986 í Nólsoy. Fráboðað úr Dawlish Warren, Devon, Onglandi 28.1.1997.

Gamalt tjaldur merkt 28.12.1989 nær við Bugg Oil Terminal, Cromarty Firth, Scotland. Funnið deytt i hafti í Gásadali umleið 1.7.1998.

2 ára gamalt tjaldur merkt 13.2.1994 í Llanfairfechan, Gwynedd, Wales. Funnið deytt í Sørvági   1.7.1998.

Gamalt tjaldur merkt 17.6.1995 í Terrington Bund, Norfolk, Onglandi. Var yvirkoyrt á Eiði 20. 6.1998.

Sýldur drunnhvíti  merktur 15.7.1980 í  Mykinesi. Fráboðaður úr sama stað  23.8.1998.

Sýldur drunnhvíti merktur 16.7.1980 í Mykinesi.  Fráboðaður úr sama stað  23.8.1998.

Lomvigarpisa merkt 29.6.1998 í Castle Graig, North Sutor, Skotland. Skotin sunnan úr Svínoynni  5.10.1998.

Lomvigarpisa merkt 30.6.1998 í Sumburgh, Hetlandi. Skotin í ein útsynning úr Borðoynni  5.10.1998.

Sum lesarin óivað longu hevur sæð, eru tvinnir sýldir drunnhvítar fráboðaðir úr Mykinesi síðsta ár. Ein enskur skúli, Brathay Explorations Group, var á vitjan her í 1980. Tey ringmerktu tilsamans 4169 fuglar tað eina summarið, tey vóru her, og av teimum vóru teir 558 sýldir drunnhvítar.

Í árunum millum 1923 og til 1999 eru íalt 3921 sýldir drunnhvítar vorðnir ringmerktir her á landi. Eingin av teimum er fráboðaður úr útlondum og bert fáir eru fráboðaðir úr Føroyum.  Hesir báðir, sum vóru fráboðaðir úr Mykinesi síðsta summar, vóru merktir sum gamlir fuglar, og eru tí í minsta lagið 19 ára gamlir.

Einans eini 10.000 pør av sýldum drunnhvíta verpa í Norðurevropa. Men í New Foundlandi er meginstovnurin, og har telist hann í milliónatali.

 

Mynd: Fransaterna som speglar sær.

Myndatakari: Thomas Grüner.

 

NB: Í síðstu Ringmerkingarfráboðanini frá 17 feb. 1999 stóð:

"men júst hvussu nógvar ringar teir brúktu, og hvønn fugl teir merktu, hevur tað ikki eydnast okkum at fingið at vita enn". Har skuldi staðið:

Undir seinna veraldarbardaga ringmerktu bretar fugl her á landi við enskum  ringum, men júst hvussu nógvar ringar teir brúktu, og hvønn fugl  teir merktu,  hevur tað ikki eydnast okkum at fingið at vita enn!