02.1999

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Lortamási merktur 17.5.1987 í Nólsoy. Funnin sjúkur, og tí kiptur í Tórshavn 10.7.1998.

Kvørkveggjuungi merktur 19.7.1996 í Nólsoy. Funnin deyður í Nólsoy 1.4.1998.

Ung spurvabøga merkt 16.7.1994 í Nólsoy. Funnin deyð í Nólsoy 25.2.1998.

Gomul rita merkt 7.7.1983 á Bleiksøy, Andøy, Nordland, Noreg. Fleygað á Fugloyarbankanum 8.1.1998.

Gamal lundi merktur 22.6.1983 á Værholmen, Røst, Noreg. Funnin deyður nær Skarvanes 5.2.1998.

Gomul álka merkt 22.6.1993 á Sule Skerry, Orkney. Skotin á Tangafirðinum 5.1.1998.

Lomvigarpisa merkt 20.6.1992 á Fair Isle, Skotlandi. Skotin eystan úr Nólsoynni 8.11.1997.

Drunnhvíti merktur 14.8.1995 í Hernyken, Røst, Noreg. Fangaður og sleptur aftur í Nólsoy 15.7.1998.

Drunnhvíti merktur 6.8.1989 í Mykinesi. Fráboðaður úr Ellidaey, Vestmannaeyjar 14.8.1998.

Gamal náti merktur 6.10.1995 á Stórhøfði, Vestmannaeyjar. Fleygaður á Viðareiði 17.9.1998.

Valmásaskuri merktur 13.7.1997 nær Fauskevika, Bjørnøya. Skotin vestan úr Sandoynni 28.1.1998.

Tjaldursungi merktur í Mikladali 15.6.1992. Funnin doyggjandi í hafti í Rituvík 25.7.1998.

Valmásaskuri merktur 8.7.1991 nær Glupen, Bjørnøya. Skotin á Nólsoyarbankanum umleið sep. 1992.

Í ár eru 100 ár liðin síðani danir byrjaðu at ringmerkja fugl. Tað var Hans Chr. C.Mortensen, lærari í Viborg, sum í 1899 sjálvur setti ætlanina í verk. Fyrstu ferð eg veit um, at ringmerkt hevur verið í Føroyum var í 1923, og síðani tá eru tilsamans umleið 70.000 fuglar ringmerktir her við donskum ringum. Undir seinna veraldarbardaga ringmerktu bretar fugl her á landi við enskum ringum, men júst hvussu nógvar ringar teir brúktu, og hvønn fugl teir merktu, hevur tað ikki eydnast okkum at fingið at vita enn. Men um vit skeita til Íslands, eru vit veruligir eftirbátar á økinum. Síðan 1921 og til í dag, eru meira enn 450.000 fuglar blivnir ringmerktir í Íslandi, og haraftrat byrjaðu teir at nýta egnar íslendskar ringar longu í 1932. Tá talan er um ringmerking í Føroyum, er tað framvegis Zoologisk Museum í Keypmannahavn, ið fíggjar og tekur sær av øllum tí umsitingarliga arbeiðnum, ið stendst av ringmerkingini her á landi. Hetta skal ikki skiljast so, at tey gjalda løn til tey, ið ringmerkja, tí tað fær eingin løn fyri; men teir fíggja ringarnir, ið verða brúktir, og gjalda tað umsitingarliga arbeiði, ið stendst av hesum.

Mynd: Lógv.

Myndatakari: Thomas Grüner.