02.1998.

RINGMERKINGARFRÁBOÐANIR

við Jens-Kjeld Jensen, fuglaútstappara, Nólsoy.

Gamalt tjaldur merkt á reiðrinum í Sandvík 16.6.1992. Var fangað aftur í Sandvík og loyst úr hafti 31.7.1997.

Tjaldursungi merktur 19.3.1969 nær Whiteford Burrows, Glamorgan, Wales. Tjaldrið var funnið deytt í Sørvági 15.11.1976.

Gamalt tjaldur merkt 22.9.1990 nær Harbour Estate, Belfast, Northern Ireland. Var funnið deytt í Sørvági 7.4.1998.

Gamal náti merktur 9.10.1992 í Stórhöfði, Heimaey, Vestmannaeyjar. Var fleygaður á Fugloyarbankanum 14.12.1997.

Gamal náti merktur 26.3.1993 í Stórhöfði, Heimaey, Vestmannaeyjar. Var fleygaður í Salthøvði, Sandoy 13.2.1998.

Gamal náti merktur 6.4.1993 í Stórhöfði, Heimaey, Vestmannaeyjar. Var fleygaður 15 míl norðan úr Føroyum 20.3.1998.

Gamalt tjaldur merkt 10.2.1990 í Heacham, Norfolk, England. Var loyst bæði úr hafti og ringi á Sandi umleið 1.8.1996.

2 ára gamalt tjaldur merkt 30.7.1995 í Wig, Gwynedd, Wales. Var funnið deytt í hafti í Mykinesi 12.8.1997.

Gamal náti merktur 11.7.1997 í Eynhallow, Orkney. Lendi á dekkinum á "Smaragd", ið 5.2.1998 var í fiskiskapi Eystri í Holinum.

Tá ið hugsa verður um at heysta av yvirskotinum - tað verður seg av fugli ella fiski - ræður tað altíð um at taka tað, ið tolur at verða tikið. Tá talan er um fuglarøkt, ræður tað um at taka ungfuglin, og so altíð at lata tann verpingarføra fuglin fáa frið, tí tað er jú hann, ið syrgir fyri, at vit framhaldandi hava nóg mikið at taka av.

Ofta hava menn kring landið greitt mær frá, at gamlir nátar, sum verða fleygaðir á heysti, eru serliga leskiliga feitir og moyrir. Og nú tá so tosið hevur gingið, um at nátin er farin at minka í tali, helt eg, at eg átti at kannað hetta gjøllari. Sum sagt so gjørt.

Eg havi kannað náta, sum er fleygaður í Viðareiði í septembur mánaða í ár. Ikki tí, um nátarnir eru frá Viðareiði ella Sumba skuldi gjørt tað sama. Úrslitið gjørdist ikki minni áhugavert. Allir teir "gomlu" nátarnir, sum eg fekk sendandi til kanningina, vóru ungir nátar, trý til fýra ára gamlir ! Eingin av teimum hevur nakrantíð vorpið, og aftan á at hava ligið undir lokið og smákóka í einar tveir tímar, datt kjøtið av rovunum uttan nakað hóvasták.

Tað er bert eitt minus við at taka "gamlan" (ungan) náta á heysti, og tað er, at teir byrja at verða fjarðursárir og staputir síðst í sep. mánaða. Eg vil tí her bera ráðini víðari um at taka gamlan náta frá umleið 25 aug. til umleið 25 september. Verður byrja at taka gamla nátan fyrr, kann verpingarfuglurin verða tikin samstundis, og hendir tað, verður tað ringast fyri okkum sjálvi.

Sama mynstrið er galdandi, tá nátin verður fleygaður í mai mánaða, tí tá er heilt vanligt at finna stór egg í fleygafuglinum. So best er at enda við fleygingini síðst í apríl og so at vinna tað aftur við at fleyga í august.

Væl gagnist ........

Tekstur til mynd: Tveir gamlir nátar

Myndatakari: Thomas Gruner.