01.1998.

RINGMERKINGARFRÁBOÐANIR

Við Jens-Kjeld Jensen , fuglaútstappara, Nólsoy.

Ungur skatumási merktur 30.12.1985, Bridge of Dee , Crampian Region, Scotland . Var yvirkoyrdur í Skálavík 22.10.1997.

Gomul likka merkt 1.4.1996 í Hempsted, Gloucester , Gloucestershire , England . Var yvirkoyrd í Tórshavn 28.5.1997.

Gamal lomvigi merktur 2.7.1971 á leiðini nær við Stóra Dímun. Hann var skotin tann 8.11.1997 á leiðini eystan úr Akrabergi. Hesin lomvigin er tann elsti føroyski lomvigin, vit enn kenna til.

Gamal náti merktur 29.12.1991 um borð á Norðberg 10 míl norðan úr Fugloynni. Hesin nátin druknaði á eini línu um borð á "Osla", ið royndi norðan úr Fugloynni 5.12.1997.

Gamal náti merktur 24.2.1976 nær Flemmich Cap um borð á týskum fiskifari. Rovini av nátanum var funnið í Sørvági 30.6.1994.

Gamal náti merktur 17.7.1972 á leiðini 63.18N - 12.49W um borð á týskum fiskifari. Rovini av nátanum vóru funnin í Sørvági umleið í 1994 útgávuni.

Ein stari var fangaður í Tórshavn 9.11.93. Hann var síðani fluttur til Eiðis, hvar hann var merktur og sleptur. Tann 9.9.97 var hann funnin deyður í Tórshavn ! Hetta er longsti teinur ein stari hevur flogið her á landi.

Rita merkt 15.1.1993 um borð á Norðberg norðan úr Fugloynni. Hon var skotin eystan úr Nólsoynni 1.10.1997.

Gomul rita merkt 10.7.1990 á Foula. Var fangað og slept aftur um borð á Norðberg 10.6.1997, sum tá var á leiðini 62^o N - 6^o W .

Gamalt tjaldur merkt 10.8.1987, Friskney New Marsh, Lincolnshire , England . Var loyst úr hafti í Tvøroyri 28.8.1997.

Hugleiðing um støðuna hjá búfugli okkara í ár.

Nógvir starar vurpu tvær ferðir í ár, og flestu ungarnir tykjast verða sterkir og væl fyri. Nakrar kvørkveggjur vurpu 4 ferðir í ár hóast nakað kaldligt var í veðrinum. Hvussu nógvar koma undan, veldst um hvussu nógvar kettur eru í økinum, hvar kvørkveggjan búleikast !

Øll eg havi tosað við, boða frá einum góðum ári hvat viðvíkjur lomviganum. Fleiri lomvigar hava vorpið í ár sammett við seinastu árini. Og somuleiðis hava menn sæð mangan hellufugl í summar. Alt í alt tykist lomvigin at hava ein glotta fyri framman um vit gloyma Vestmannabjørgini, hvar støðan bara versnar ár undan ári við færri og færri lomvigum!

Ternurnar hava fingið nakrar floygdar pisur á veingirnar ymsa staðni kring landið, og árið má sigast at verða hampuligt, hóast støðan hjá ternuni ikki kann sammetast við hana hon var fyri 30 árum síðani, tá ternan varp nærum alla staðni.

Í Hetlandi var eingin ternupisa floygd í summar, hóast teir hava latið væl at tey seinnu árini.

Viðvíkjandi rituni kan eg bert lýsa støðuna hjá henni við einum orði - ein vanlukka !

Í Hetlandi var heldur eingin ritupisa floygd í ár.

Lundin tykist hava havt eitt hampuligt summar. Í byrjanini sá støðan góð út, men tá avtornaði var úrkoman bert miðal. Og eins og í árunum 1992-93 var støðan verst, jú longri vit komu móti vestri. Besta dømi er at hyggja at støðuni í Mykinesi.

Á oynni Røst í Noregi er støðan hjá lundanum hættislig. Røst hevur annars størsta lundabølið í Noregi. Lundin varp eins og hann plagar, men einki var at geva pisuni. Sildamurturin, ið lundin gevur pisuni, tyktist ferðast fram við Røst ov tíðliga og ov skjótt. Í einum øki, hvar 150 reiður vórði eygleidd, var bert 1 pisa floygd.

Verpingarlundin á Røst minkaði við heilum 18 % í tali síðsta ár. Støðan er versnað so líðandi tey seinastu tríati árini, og seinasta góða árið lundin hevði har var í 1992. Tað má tí sigast verða ein vána uggi, at norðmenn í ár fingu fráboðan um ein lunda, ið var merktur 33 ár frammanundan, og sum tístatt er elsti ringmerkti lundin, nakar veit um.

Annars tykjast lundarnir í bølunum longur norðuri í Barentshavinum at hava havt eitt gott summar við nógvum floygdum pisum.

Tekstur til mynd: Ein móð rita.

Myndatakari: Thomas Grüner.